لو متخانق مع مراتك ..اخلع على سوريا !
مع ظهور هلال العيد أعلن فندق فى سوريا أنه خصص غرفة لاستضافة الرجال المتشاجرين مع زوجاتهم مجاناً حتى يتم حل الخلاف .. ولكن شريطة ابراز ما يثبت الخلاف مع الزوجة ، يعنى كدمة على كسر على طقم اسنان فى كيس بلاستك ، خليك حدق كده وصحصح معنا. الراجل صاحب الفندق ابراهيم المفعلانى صرح بأن الغرفة اللى خصصها للرجالة " اللى لامؤخذة يعنى " واخدين علقة من زوجاتهم بمثابة زكاة الفطر الخاصة به ، وهو شايف -ومن حق كل واحد يشوف اللى عايزه- انه كده هو بيعمل خير .. خصوصا إن موضوع الرجال المضروبين زاد عندهم والناس دول –اللى هما الرجالة المضروبين لامؤخذة – مش لاقين أماكن بعد ما أنطردوا من بيوتهم أو إنهم بيروحوا عند ناس أصحابهم ، وطبعا بيكون لهم دور رائع فى " تهدئة النفوس " .
انا مش هقول لكم تخيلوا لو حصل عندنا الموضوع ده ..يعنى فندق يفتح أبوابه لمنكوبى الخلافات الزوجية من الرجال .. لأن الوضع هيكون محرج وهيبقى منظر مش ظريف واحتمال الفندق يضطر يتعاقد مع مستشفى تخصصى له غرفة عناية مركزة والموضوع هيكبر واحنا مش ناقصين .. علشان كده لو متخانق مع مراتك اخلع على سوريا وربنا يعمل اللى فيه الخير !
وبكده يكون الفندق الواقع فى مدينة درعا السورية هو الفندق الفريد من نوعه فى العالم كله اللى هتلاقى فى اللوبى بدل وكرفتات ..ومعها جبس وكدمات وكسور وجروح
التسجيل 
